P O R T R A I T L A U R A K O R E L L
Hoi zäma, i bin d'Laura.
I leba do in Andeer sit em Frühlig 2004. Hera züglet bin ich usem Berner Seeland, wo i mini Usbildig als Beriterin absolviert han. Aber alles schön der Reihe noh...
S'Liecht vo dere Wält han i im Früehlig 1982 im lozärnische erblickt und ufgwachse bin i in Geiss und Altishofen - au bekannt unterem Name Gallikhofen.
Bereits mit 9 han i z'Geiss s'Interesse zu dena vierbeinige Kollege entdeckt, über de Esel vo miner Schuelkolegin. Wenn immer i Zit gfunde han, bin i mit ihm go usritta oder han susch öpis mit ihm agstellt. Später denn in Altishofe han i as Pflegross kha. Zum Lasko hani guet 5 Johr gluegt.
Nach em Hushaltlehrjohr im Jura, natürlich uf ma Hof mit vielna Ross und anderne Tier, wo i unter anderem s'Reit-Brevet gmacht han, oder au am Marche-Concours han dörfe teilneh, han i denn nach diverse Praktika in verschiedne Ställ im Summer 2000 mini 3-jährig Usbildig zur Bereiterin im Stall Kurt Blickenstorfer in Ins agfange.
Dört han i denn au mis erschte eigne Fribi-Föhli Daria ka wo i selber grosszoga han. Bis im Früehlig 2005 isch sie an treue Wegbegleiter vo mir gsi. Mit ihre han i do im Schams au die erschte Stunde gäh. Leider isch sie denn viel z'früah gstorba.
Während der Usbildig im Berner Seeland sind denn no 2 witeri Ross derzua ko, der Baruch und Babylone IV. Us dene zwei verrittne Tier han i wieder zuetraulichi Kolege gmacht.
Da miar s'Ritta immer selber schu sehr viel Freud bereitet het, han i mich damals entschlosse mini Lideschaft zu minem Bruef z'mache und z'lerne, wie mehr au anderne Lüt und Ross öbis bibringe kann. Für das han i im Kurt Blickenstorfer e sehr guete Lehrmeister gfunde. Im Summer 2003 han i denn d'Abschlussprüefig als Bereiterin gmacht.
Im Früehlig 2004 han i denn mini Hab packt, und bin uf Andeer züglet. D'Summer '04 und '05 han i uf Albin zum Galtveh glueget mit flotter Unterstützig vu minem "Hirtehund" Winni. Hüt bin i durch der Winter jewils am Lift in Splüga a z'treffa und Früehlig bis Herbst gon i neb miner Rittschueltätigkeit jewils mit am Huefschmied Hans-Andrea Fontana mit go Ross bschloh.